Project:A propòsit

This page is a translated version of a page Project:About and the translation is 100% complete.

---

Translatewiki.net a l'é na piataforma ëd localisassion për le comunità ëd tradutor, le comunità lenghìstiche, e ij proget lìber e a sorgiss duverta. A l'é ancaminà con la localisassion për Mediawiki. Apress a l'é stàit giontà ël manteniment për j'estension Mediawiki, FreeCol e d'àutri proget lìber e a sorgiss duverta. Vëdde la lista completa dij proget mantnù.

Translatewiki.net a l'é pa part dij proget ëd la Fondassion Wikimedia, ni ëd qualsëssìa fondassion o proget a sorgiss duverta. A l'é gestì da Nike e Siebrand, ch'a son tùit doi dësvlupador e a l'han na serta esperiensa an i18n e L10n, com d'àutri mèmber ëd l'echip. Le funsionalità ëd tradussion a son dàite da l'estension Translate ëd MediaWiki. Sta wiki a conten sempe ëd còdes sperimental, e a peul esse ocasionalment fòra ëd servissi. Për piasì, ch'a pòrta passiensa, ij problema a son ëd sòlit arzolvù an pressa. Ij problema a peulo esse signalà a la pàgina ëd manteniment.

Drit ëd còpia e avertiment

TRANSLATEWIKI.NET A DÀ GNUN-E GARANSÌE ËD BON FUNSIONAMENT

Ch'a deuvra le tradussion an translatewiki.net a sò arzigh. A sërco esse ùtij ma translatewiki.net a peul pa garantì la validità dël contnù trovà ambelessì.

Translatewiki.net e ij sò editor a dan pa gnun-e garansìe an sij contnù an gnun-a manera, ni ciàiri, implìssita, o ëd lej, ancludend, ma nen mach, qualsëssìa garansìa ëd comersiabilità o d'idoneità per un particolar but o qualsëssìa garansia che ël contnù a l'abia pa d'eror.

Le tradussion a son ësmonù an licensa dai tradutor CC-BY 3.0, e ij travaj derivà a peulo ëdcò esse smonù sota le license dij rispetiv proget Lìber e a Sorgiss Duverta anté che le tradussion a son ëstàite e a saran giontà. Ij contnù dle pàgine utent a son considerà "Tùit ij drit riservà" da l'autor. Tut ël rest dël contnù a l'é smonù an licensa CC-BY 3.0 gavà che na licensa diferenta o dij drit d'autor a lo stabilisso esplicitament.

Stòria

Translatewiki.net a l'é partìa ant ël 2006 com wiki ëd test, dësvilupà da Nike, an colaborassion con Gangleri, com n'utiss d'antërnassionalisassion për la localisassion dël programa ëd MediaWiki. A l'é partìa sota ël nòm Betawiki, che a l'é dventà translatewiki.net a l'inissi dël 2009, da già che ël sit a l'é stàit tramudà a un servent virtual ospità sota sò nòm ëd domini, ël 9 ëd novèmber dël 2007. Da otóber 2007 translatewiki.net a contribuiss a la localisassion ëd sirca 70 lenghe, che da giugn 2010 a son chërsùe a 329 lenghe. Com ël nùmer ëd le lenghe a l'é chërsù a l'é visìbil ant la tàula dle pere miliar dle tradussion passà për MediaWiki. Da gené 2010 a-i é staje da manca ëd n'ameliorassion a la capacità dël servent, për coaté l'aument ëd l'atività. Netcup a l'ha generosamant ospità translatewiki.net dal novèmber 2007.

D'àutri proget lìber e a sorgiss duverta a son ëstàit man a man giontà a translatewiki.net, an partend con FreeCol an aost 2007. Da giugn 2010 ël nùmer ëd proget mantnù a l'é chërsù fin a 16.

Ij contribudor ëd translatewiki.net a son tùit volontari, an gavand un mèmber ëd l'echip ch'a arsèiv un pagament për part ëd sò temp (vëdde finansiament sì-sota). Dësvlupador, aministrator e tradutor a son stàit pijà inissialment dai proget MediaWiki, dzortut Wikimedia. Tanti dij nòst contribudor a rivo anco' sì da MediaWiki, ma con pi proget rivà tùit ansema, MediaWiki a l'é pa pi l'ùnica sordiss ëd contribudor. Da giugn 2010, ël nùmer ëd tradutor registrà a l'é ëd 1.860.

An collaborassion con Stichting Open Progress e FUDForum, translatewiki.net a l'ha organisà vàire gare ëd tradussion con premi disponìbij për ij tradutor, për amelioré la localisassion ëd MediaWiki e FUDForum.

• Ant ël 2008 ël NGO olandèis Hivos a l'ha dàit dij sòld via Stichting Open Progress. Ij sòld a son ëstàit dovrà për dé dij premi për le tradussion ant na lista dë 70 o 80 lenghe parlà an Àfrica, Asia, e América Latin-a che a l'han un sert nùmer ëd parlant, ma pa basta d'apògg an MediaWiki.
• A la fin dël 2008 a l'é tnusse na gara ëd tradussio ëd fin ëd l'ann duverta a tùit ij tradutor.
• An aost 2009 a l'é stàita organisà n'àutra gara ëd viragi, speisà da Wikimedia Nederland, ël capìtol ëd Wikimedia olandèis.
• Wikimedia Nederland a l'ha ëdcò speisà la gara ëd fin ann 2009.

Ël but ëd translatewiki.net a l'é descrivù ant l'Introdussion. J'agiut técnich ai tradutor a son descrivù ant sla pàgina Technology Sti agiut a son amplià e ameliorà an continuassion për fé ven-e ël travaj ëd tradussion ël pi eficient possìbil. Jë bzògn corent dël sit e sò dësvlup a son descrivù su Todo e Issues and features.

Finansiament

• Translatewiki.net a l'é ëd fasson grassiosa ospità da Netcup – webspace and vServer, a soe spèise da novèmber 2007, con ampliament a fërvé 2008 e gené 2010.
• GoogleAds a l'é stàit antroduvù an aost 2008, ma fin-a adess a l'ha generà dij guadagn propi cit - men che 150 éuro.
• Stichting Open Progress a l'ha organisà vira për vira dë speisé le gare ëd tradussion për amelioré la localisassion ëd MediaWiki, com spiegà dzora.
• An otober 2009 la Fondassion Wikimedia a l'ha faje un contrat a Siebrand për travajé un di a la sman-a su translatewiki.net per n'ann.

Përson-e daré ëd translatewiki.net

Echip prinsipal

Ij mémber dl'echip prinsipal a son coinvòlt giornalment për fé marcé translatewiki.net. Lor a l'han ëdcò acess ai servent e a son responsàbij për fé che le ròbe a giro con men problema possìbil. Për savèjne ëd pi, për piasì ch'a consulta le pàgine përsonaj dj'utent.

Nike

Fondator, dzortut travaj ëd dësvlup

Siebrand

Mansé ëd la comunità, coordinator ëd proget, dësvlupador

Raymond

Amportador dle tradussion për MediaWiki, dësvlupador

I dipendoma ëdcò dal travaj fàit da d'àutri mèmber ëd nòsta comunità:

• Gangleri – prima visionari, pa pi ativ
• GerardM – Ambassador, areclam an dovrand un contat diret, scartari, StatusNet, Twitter
• Tùit ij contat an minca proget
• Tùit ij tradutor a j'àutri mèmber d'ës proget

Partìe

Tùit ij contribudor a son organisà an vàire partìe, minca partìa a l'ha ij sò privilegi. Parèj che ant j'àutre wiki, le përson-e ch'as registro an sla wiki a son ciamà Utent. J'utent a son automaticament confermà 4 di apress la registrassion, an përmëttendje ëd mandé dij mëssagi ëd pòsta eletrònica a j'àutri utent. J'Administrator a l'han pi 'd privilegi, prinsipalment për protege ël sit dai vandalism. Ij Mangiapapé a l'han chèich privilegi an pi, per dé e gavé ij normaj drit dj'utent, ma a son fàit mangiapapé dai mèmber dla partìa Echip. Ij Trigomiro a son dij cont d'utent che a peulo fé ëd travaj automaticament. I drit d'Amportassion, ch'a përmëtto a n'utent d'amporté dle pàgine da d'àutre wiki, a son dovrà da ràir ambelessì.

An dzorpì dë ste partìe usuaj, translatewiki.net a l'ha ëdcò dle partìe speciaj d'utent për ij sò but. IJ Tradutor a peulo modifiché ant jë spassi nominaj protegiù, an dovrand l'antërfacia ëd tradussion. Chèich tradutor a peulo travajé fòra ëd linia sle soe tradussion. La partìa dl'Echip a son tùit ij mansé d'ës sit. Lor a ampòrto ij mëssagi da volté e a mando le tradussion completà ai proget che a deuvro translatewiki.net. Lor a peulo modifiché ij mëssagi sorgiss an Anglèis su chèich proget, comprèis MediaWiki. A gestisso tùti j'aspet dël programa dovrà ambelessì.

Ij drit tacà a minca partìa d'utent a son listà an sla pàgina Drit dle Partìe Utent. Le liste dij mèmber ëd minca partìa a peulo esse viste an sla pàgina dla Lista dj'Utent.

Esploré

• Tanti contribudor a son già familiar con l'usage dël programa wiki. S'a l'é nen pràtich dël programa wiki alora a peul amparé le bas e trové agiut su com modifiché dzora a MediaWiki.org.
• Dëscheurve com ij tradutor a travajo su costa introdussion a la tradussion.
• Anformassion técniche an sël programa dovrà al moment da translatewiki.net.
• Translatewiki.net a produv dë statìstiche për ten-e cont dij progress ant le tradussion, për lenga e për proget. Ch'a dëscoata le statìstiche e d'àutre anformassion sla pàgina general dle statìstiche.

Panoràmica dij métod ëd translatewiki.net

• Su translatewiki.net ij tradutor a vòlto l'antërfacia dël programa për ij prodot anté che le stringhe ëd test anglèis a son ëstàite isolà dal còdes e a son ëstàite organisà an "mëssagi" sìngoj.
• Quand a-i riva un proget neuv, a son amportà ij mëssagi sorgiss an anglèis. Ëd neuv mëssagi an anglèis a son amportà vira për vira.
• Le tradussion a peulo esse fàite për minca mëssagi ant na sotpàgina separà ëd l'original anglèis për minca lenga, /xxx për ël còdes lenga xxx.
• Sot-pàgine ciamà /qqq a son dovrà për la documentassion dij mëssagi. La documentassion a l'é scrivùa manualment e normalment a l'é ëd pi bon-a qualità quand a esisto ëd bon-e comunicassion con l'echip dij dësvlupador dël programa original. Se ij coment dël còdes sorgiss a son part d'un proget ëd programa, costi-sì a son ëdcò smonù ant l'antërfacia ëd tradussion.
• Ij tradutor a fan dij sugeriment për amelioré o corege un mëssagi an anglèis original, o adatelo për përmëtt-ne na localisassion. Se a-i é l'acòrd, costi a son modificà dai mèmber ëd translatewiki.net che a son ëdcò dësvlupador an sij sò proget, o signalà ai dësvlupador dël proget.
• Le tradussion complete për minca lenga a son "consignà" al proget da l'echip ëd translatewiki.net, quand che ël nùmer ëd tradussion për un proget an cola lenga a l'ha passà la seuja concordà për col proget. Për la frequensa ëd consigna e la seuja vëdde le pàgine dij proget.
• La publicassion dle tradussion dël programa che a l'é stàita consignà a un proget a l'é controlà e fàita da j'aministrator dël proget e a l'é fòra dël contròl ëd translatewiki.net.
• Ij tradutor ch'a travajo su MediaWiki a vòlto ëdcò ij nòm dle pàgine speciaj, le paròle màgiche e jë spassi nominaj, an dovrand la pàgina tradussion avansà ëd MediaWiki.
• Quand che na lenga neuva a l'é ampostà su translatewiki.net, j'element localisà a l'inissi a ancludo ij senari e soe diression e na lenga ëd sigurëssa; d'àutri element localisà a peulo anclude ël formà ëd data e ora, ël formà ëd nùmer, e le funsion ëd PLURAL, ëd gramàtica e ëd géner. La convergensa con ij dat ëd localisassion ëd CLDR a ven pijà an cont. Al moment j'ùnich dat pijà da CLDR për translatewiki.net, e su mediaWiki, a son ij nòm dle lenghe localisà.

Contatne

A peul lassé un mëssagi an sla nòsta pàgina ëd discussion prinsipal a Support. S'a preferiss le discussion vive antlora ch'a preuva nòst canal IRC #mediawiki-i18n su freenode. Pa preferì, ma se necessari për rason ëd sicurëssa o d'arzervatëssa, a peul dovré la pòsta eletrònica com métod ëd contat a "translatewiki LUMASSÒLA xs4all PONT nl" - an rimpiassand "LUMASSÒLA" con "@" e "PONT" con ".", e an gavand ëdcò jë spassi da l'adrëssa ëd pòsta eletrònica.

• A peul dëscute dij problema ëd na lenga particolar con ij sò tradutor an sla pàgina ëd discussion dël portal ëd la lenga.
• A peul dëscute dij problema d'un proget particolar con ij sò sostnidor e la partìa dij dësvlupador an sla pàgina ëd discussion dla pàgina ëd proget.
• A peul discute dij problema con j'utent individuaj an soa pàgina ëd discussion utent, o për pòsta eletrònica (ch'a sgnaca an sl'anliura ant la bara lateral sla pàgina utent), se lor a l'han sërnù ëd përmëtte ij mëssagi an pòsta eletrònica.