Project:Régole ëd confidensialità

This page is a translated version of a page Project:Privacy policy and the translation is 100% complete.

---

But general

Si regolament a coato j'anformassion përsonaj identificàbij cujìe o memorisà da translatewiki.net sij sò servent an relassion al proget e a soa comunità. Translatewiki.net a cheuj e a ten l'ùltim ansema d'anformassion përsonaj identificàbij necessarie a coaté jë bzògn operassionaj dël proget.

La natura pùblica e colaborativa dël proget

Translatewiki.net a l'é dësvlupà an colaborassion dai sò utent ch'a deuvro ël programa MediaWiki. Tuti coj ch'a l'han otnù ij përmess ëd modìfica a peulo modifiché le pàgine modificabij d'ës sit quand ch'a son intrà ant ël sistema com utent registrà. Fasend sossì, j'editor a creo un document publicà, e na registrassion pùblica ëd minca paròla giontà, gavà, o cangià. Sossì a l'é n'at pùblich, e j'editor a son identificà publicament com j'autor ëd coj cambi. Tute le contribussion fàite a sto proget, e tute j'anformassion publicament disponìbij a propòsit ëd coste contribussion, a son irevocabilment smonùe an licensa e a peulo esse liberament copià, sità, utilisà torna e adatà da 'd part terse con pòche restrission.

Atività su translatewiki.net

An general, sta Régola a s'àplica mach a j'anformassion privà memorisà o mantnùe da translatewiki.net che a son pa publicament disponìbij.

J'anterassion con translatewiki.net pa coatà da coste Régole a ancludo, j'aspet dë score e modifiché dle pàgine, l'usagi dla funsion "mëssagi a n'utent" dla wiki, e nen mach. Coste anterassion a peulo rivelé n'adrëssa IP dël contribudor, e miraco d'àutre anformassion përsonaj, indiscriminatament al pùblich general, o a partìe specìfiche ëd volontari ch'a agisso indipendentement da translatewiki.net.

J'utent a peulo ëdcò anteragì con d'àutri fòra ëd translatewiki.net, via pòsta eletrònica, IRC o n'àutr sistema ëd ciaciarade, o un sit an sl'aragnà andipendent, e a dovrìo conòsse j'arzigh colegà, e ij sò përsonaj bzògn d'arzervatëssa, prima ëd dovré ste manere ëd comunicassion.

Cont d'utent e paternità

Translatewiki.net a ciama a j'editor ëd registresse con sò sit an sl'aragnà, bele che chèich pàgine a peulo esse modificà sensa intré ant ël sistema con në stranòm d'utent, e an col cas a saran identificà da l'adrëssa IP dla rej. J'utent ch'as registro a saran identificà da sò stranòm utent. J'utent a serno na ciav, che a l'é confidensial e dovrà për verifiché l'integrità ëd sò cont. Gavà andoa ch'a sia obligatòri për lej, gnun a dev rivelé, o smon-e an ciàir, ni le ciav utent ni ij bëscotin generà për identifiché n'utent. Na vira creà, ij cont dj'utent a saran pa eliminà, gavà ch'a-i sia na ciàira antension grama, second ël giudissi dl'echip ëd translatewiki.net. A l'é esse possìbil për në stranòm d'utent d'esse cangià. Translatewiki.net a garantiss pa che në stranòm d'utent a sia cangià su arcesta.

But ëd la cujìa dj'anformassion përsonaj

Translatewiki.net a lìmita la cujìa ëd dat utent përsonaj identificàbij ai but ch'a servo a fé marcé bin ij sò proget, comprèis (ma nen mach) a lòn ch'a-i ven dapress:

• Për amelioré la responsabilità pùblica dël proget. Translatewiki.net a arconòss che minca proget ch'a l'é duvert bastansa për përmëtte la partecipassion pi gròssa possìbil dël pùblich an general a sarà ëdcò vulneràbil a serte sòrt d'abus e comportament pa produtiv. Translatewiki.net a l'ha stabilì na quantità ëd mecanism për preven-e o rimedié a d'atività abusive. Për esempi, quand a s'invéstiga su n'abus sël proget, comprèis l'usagi suspet ëd buratin malign (cont duplicà), vandalism, cimenté d'àutri utent, o comportament distrutiv, l'adrëssa Ip dj'utent (pijà sia da coj andrinta al sistema o da la memorisassion ant la base ëd dàit) a peul esse dovrà për identifiché le sorgiss dël comportament abusiv. Costa anformassion a peul esse condividùa da j'utent con j'autorità aministrative ch'a son ancarià ëd protege ij proget.
• Për smon-e dle statìstiche dël sit. Translatewiki.net a campion-a statisticament ij dat dij registr dle vìsite dj'utent. Si argistr a son dovrà për produve dle pàgine dë statìstiche dël sit; ij dat dij registr a son pà rendù pùblich.
• Për arzòlve dij problema técnich. Ij dat dj'argistr a peulo esse esaminà dai dësvlupador con ël but d'arzòlve dij problema técnich e a ëd trové ij trigomiro malign che a apesantisso ël sit.

Translatewiki.net a peul carié dj'arsorse com JavaScript da d'àutri servent, ch'a peulo toché l'arzervatëssa dl'utent (për esempi Google Adwords o agiut a la tradussion). A l'é responsabilità dl'utent ëd limité l'esposission ëd detaj pa vorsù a causa d'arsorse carià da dij servent estern.

Detaj dël mantniment dij dat

Aspetative generaj

Adrëssa IP a àutre anformassion técniche

Quand un visitador a ciama o a les na pàgina, a son pa cujìe pi d'anformassion che cole pijà tipicament dai sit an sl'aragnà. Tfranslatewiki.net a peul manten-e ij registr dë ste transassion, ma costi a saran pa publicà.

Quand che na pàgina a l'é modificà da n'editor intrà ant ël sistema, ël servent confidensialment a memorisa j'anformassion dj'adrësse IP relative për un temp limità. St'anformassion a l'é automaticament ëscancelà apress un temp fissà. Për j'editor ch'a intro pa ant ël sistema, l'adrëssa IP dovrà a l'é publicament e përmanentement acredità com l'autor dla modìfica. A peul esse possìbil për na tersa part identifiché l'autor da costa adrëssa IP ansema con j'àutre anformassion disponìbij. Intré ant ël sistema con na stranòm utent registrà a përmët pì d'arzervatëssa.

Biscotin

Ël sit a ampòsta un bëscotin temporani ëd session an sl'ordinator dl'utent quand na pàgina a l'é visità. Ij letor ch'a veulo pa intré ant ël sistema o modifiché a peulo arfudé ës bëscotin; a sarà scancelà a la fin dla session dël navigador. Vàire bëscotin a peulo esse ampostà quand un a intra ant ël sistema për manten-e sò stat d'intrda. Se un a salva na stranòm d'utent o na ciav ant ël navigador, cola anformassion a sarà salvà fin a 30 di, e st'anformassion a sarà mandà al servent për tute le vìsite a sto proget. Ij contribudor ch'a deuvro na màchina pùblica e che a veulo pa mostré sò stranòm utent a j'utent futut dla màchina a dovrìo scancelé sti bëscotin apress dl'usagi.

Stòria dla pàgina

Le modìfiche o d'àutre contribussion al proget su tradussion, pàgine d'utent, pàgine ëd discussion e àutre pàgine a son generalment goernà për sempe. Gavand dël test dal proget as lo scancela pa përmanentement. Normalment tuti a peulo vardé na version precedenta ëd na pàgina e vardé lòn ch'a-i era. Ëdcò se n'articol a l'é "scancelà", n'utent ch'a l'ha n'àut livel d'acess a peul anco' vëdde lòn ch'a l'é stàit gavà da la vista pùblica. Dj'anformassion a peulo esse gavà përmanentement da j'utent con acess a Translatewiki.net, ma gavà le ràire vire che translatewiki.net a dev ëscancelé ël material dla stòria dle modìfiche an arspòsta a n'órdin legal o sij process legaj equivalent, a-i é pa ëd garansie ch'a-i sio dë scancelassion përmanente.

Contribussion dl'utent

Le contribussion dj'utent a son ëdcò agregà e disponìbij publicament. Le contribussion dj'utent a son agregà d'acòrdi a soe registrassion e stat d'intrada ant ël sistema. Ij dat su le contribussion dj'utent, parèj ëd cole ansima a quand j'utent a l'han modificà e ël nùmer ëd modìfiche che a l'han fàit, a son publicament disponìbij travers dle liste dij contribù dj'utent, e publicà an forma agregà da d'àutri utent.

Lese ij proget

A son pa cujìe pi d'anformassion ansima a j'utent e a j'àutri visitador ch'a leso le pàgine rispet a cole ch'a son colessionà tipicament ant ij registr dij servent dai sit an sl'aragnà. Gavà costi dat ëd registr cujì për dij but generaj, le pàgine visità a smon-o pa publicament l'identità d'un visitador. Ij dat ëd registr campionà a peulo anclude l'adrëssa IP ëd minca utent, ma sòn a l'é pà visualisà publicament.

Modifiché ij proget

Le modìfiche a le pàgine a son identificà con lë stranòm d'utent o l'adrëssa IP ëd l'editor, e la stòria dle modìfiche a l'é agregà për autor ant na lista ëd contribussion. Cole anformassion a saran disponìbij përmanentement.

Utent registrà intrà ant ël sistema:

J'utent intrà ant ël sistema a smon-o pa al pùblich soa adrëssa IP gavà ij cas d'abus, ch'a comprendo ij vandalism su na pàgina wiki da part ëd l'utent o ëd n'àutr utent con la midema adrëssa IP. L'adrëssa IP ëd n'utent a l'é memorisà sij servent ëd translatewiki.net për un sert temp, e a peul esse vëddù da j'aministrator dël servent e da j'utent che a l'han avù j'acess ëd Controlor.

J'anformassion an sn'adrëssa IP, e soe conession a minca nòm utent ch'a la partagia, a peul esse dàita sota serte sircostanse (vëdde sì-sota).

J'editor ch'a deuvro un servent ëd mëssagi professional da ca o ch'a deuvro na conession DSL o Internet, a son fàcij da esse identificà da soa adrëssa IP; an cost cas a peul esse bel fé identifiché tute le contribussion al proget fàite da cola adrëssa IP. Dovré në stranòm utent a l'é la pi bela manera ëd goerné l'arzervatëssa an costa situassion.

Utent registrà pa intrà ant ël sistema e utent pa registrà:

J'editor ch'a son pa intrà ant ël sistema a peulo esse identificà da l'adrëssa IP ëd rej. Sconda dël tipo dla conession, costa adrëssa IP a peul esse trassàbil a un gròss fornidor dl'Aragnà o ëd fasson pì precisa a na scòla, pòst ëd travaj o ca. A peul esse possìbil dovré coste anformassion an combinassion con d'àutre anformassion, comprèis lë stil ëd modìfica e ij gust, për identifiché n'àutor completament.

Discussion

Pàgine ëd discussion an sla wiki:

Qualsëssìa pàgina modificàbil a peul esse an teorìa un pòst ëd discussion. An general, le discussion su translatewiki.net a son an sle pàgine ëd discussion dj'utent (associà con n'utent particolar), an sle pàgine ëd discussion dij proget mantnù (associà con particolar proget mantnù) o an dle pàgine progetà pròpe për marcé com dle piasse ëd discussion (pr'esempi, la pàgina d'Apògg). J'aspetative d'arzervatëssa a s'àplico a le pàgine ëd discussion ant la midema manera che a j'àutre.

Për pòsta eletrònica:

J'utent a son pa obligà ëd dé n'adrëssa ëd pòsta eletrònica quand as registro. J'utent ch'a dan n'adrëssa ëd pòsta eletrònica bon-a a abìlito j'àutri utent intrà ant ël sistema a mandeje ëd mëssagi a travers la wiki. Quand a s'arsèiv un mëssagi da n'àutr utent a travers sto sistema, l'adrëssa ëd pòsta eletrònica d'un a l'é pa rivelà. Quand as sern ëd mandé un mëssagi a n'àutr utent, l'adrëssa d'un a l'é visualisà coma speditor.

L'adrëssa ëd pòsta eletrònica butà ant ij gust ëd n'utent a peul esse dovrà da translatewiki.net për soe comunicassion. J'utent dont ij cont a l'han pa n'adrëssa bon-a a podran pa riamposté soa ciav s'a l'han përdula. An costa situassion, an tùit ij cas, j'utent a podran contaté un dj'aministrator dij servent ëd translatewiki.net për anserì n'adrëssa ëd pòsta eletrònica neuva. N'utent a peul gavé l'adrëssa ëd pòsta eletrònica dël cont dai sò gust an qualsëssìa moment për evité ch'a sia dovrà. La corëspondensa privà antra j'utent a peul esse salvà a discression ëd coj utent e a l'é pa sogeta a le régole ëd translatewiki.net.

Su IRC:

Ij canaj IRC a son pa uficialment part ëd translatewiki.net e a marcio pa ant sij servent controlà da translatewiki.net. L'adrëssa IP dj'utent ch'a ciaciaro su col servissi a podrìo esse s-ciairà da j'àutri partecipant. L'arzervatëssa dj'utent IRC su qualsëssìa canal a peul esse protegiùa d'acordi con le régole dël rispetiv servissi e canal. Canaj diferent a l'han ëd régole diferente su com ij registr a peulo esse publicà.

Acess e concession dl'anformassion përsonalment identificàbil

Acess:

Ël proget a l'é prinsipalment gestì da 'd contribudor volontari. Chèich utent pì angagià a l'han dj'acess privilegià. Për esempi, ij livej d'acess ëd n'utent a translatewiki.net a son determinà da la presensa dj'utent an vàire "proget mantnù". Ij drit dle partìe d'utent e ij mèmber dle partìe a son visìbij da la pàgina Special:ListGroupRights.

J'àutri utent che a l'han acess a j'anformassion privà identificàbij a comprendo, ma a son pa mach lor, j'utent ch'a l'han acess a la funsion ëd Controlor, j'ampiegà ëd translatewiki.net, ij dipendent, ij contratista e j'agent ampiegà da j'operador ëd translatewiki.net, ij dësvlupador e d'àutri con livej àut d'acess ai servent.

Ël partagi d'anformassion con d'àutri utent privilegià a l'é pa considerà parèj ëd në "spatarament".

Concession: Régole an sla concession dij dat

A l'é la régola ëd translatewiki.net che ij dat përsonalment identificàbij cujì ant ij registr dij servent, o a travers la memorisassion ant la base ëd dàit, a travers la funsion ëd controlor, o a travers d'àutre manere pa publicament disponìbij, a peulo esse concedù dai volontari ëd translatewiki.net o da l'echip, ant un-a dle situassion sì-dapress:

1. An arspòsta a na sitassion a comparì vàlida o n'àutra arceste obligatòria an aplicassion dle laj,
2. Con ël përmess dl'utent an chestion,
3. Quand necessari për j'anvestigassion ant ij cas d'abus,
4. Quand j'anformassion a anteresso la visualisassion ëd pàgine generà da n'aragn automàtich o un trigomiro e che soa publicassion a l'é necessaria për s-ciairì o arzòlve dij problema técnich,
5. Quand l'utent a l'ha vandalisà dle pàgine o as compòrta përsistentement ant na manera distrutiva, ij dat a peulo esse concedù a un fornitor ëd dervissi, un trasportador, o d'àutre terse part për assiste ant ël dserne ij blocagi d'IP, o për assiste ant la formulassion d'un reclam al fornidor ëd servissi d'aragnà corëspondent.
6. Quand a l'é rasonevolment necessari për protege ij drit, le proprietà o la sicurëssa ëd translatewiki.net, ij sò utent o ël pùblich.

Gavà lòn ch'a l'é spiegà sì-dzora, le régole ëd translatewiki.net a përmëtto pa la distribussion d'anformassion përsonalment identificàbij an gnun-e sircostanse.

Acess ëd terse part e notificassion ëd j'utent registrà quand a s'arsèiv na procedura legal:

Com prinsipi general, l'acess a, e ël mantniment ëd, dat përsonalment identificàbij an tùit ij proget a dovrìa esse mìnim e a dovrìa esse dovrà mach antërnament për giuté ël proget a marcé bin. Ocasionalment, an tùit ij cas, translatewiki.net a peul arsèive n'arcesta ëd comparission o d'àutre arceste obligatòrie da n'organism d'aplicassion dle laj o da na cort ëd giustissia o còrp governativ equivalent che a ciama dë smon-e d'anformassion su n'utent registrà, e a peul esse për lej obligà a ubidì a l'arcesta. Ant ël cas ëd n'arcesta legal obligatòria parèj, translatewiki.net a sërcrà d'anformé l'utent tocà tre di ëd trafaj apress cola arcesta an mandandje un mëssagi a l'adrëssa ëd pòsta eletrònica (s'a-i é) che l'utent an chestion a l'ha butà ant ij sò gust.

Translatewiki.net a peul pa dé 'd consèj a n'utent quand a arsèiv na notificassion parèj ch'a toca la lej, ni n'arspòsta aproprià a na notìfica. Translatewiki.net a fà noté, an tùit ij cas, che col utent a peul avej ël drit legal ëd resiste o limité cole anformassion an giudissi an scrivend n'arcesta për fërmé la procedura. J'utent ch'a veulo oponse a n'arcesta a comparì o a d'àutre arceste obligatòrie a dovrìo ciamé n'opinion legal consernent ij drit aplicàbij e le procedure che a peulo esse disponìbij.

Se translatewiki.net a arsèiv na mossion d'un tribunal d'anulé o ëd limité la notìfica com arzultà dl'assion ëd n'utent o ëd sò avocà, translatewiki.net a publicrà pa j'anformassion ciamà fin che translatewiki.net a arsèiv pa n'órdin dal tribunal ëd felo.

J'utent registrà a son pa obligà ëd dé n'adrëssa ëd pòsta eletrònica. An tùit ij cas, quand l'utent registrà an chestion a dà pa n'adrëssa ëd pòsta eletrònica, translatewiki.net a podrà pa anformé col utent con un mëssagi privà quand a arsèiv d'arceste da la lej dë smon-e dj'anformassion përsonalment identificàbij an sl'utent.

Avis

Translatewiki.net a chërd che mantnì e preservé l'arservatëssa dij dat dj'utent a l'é un valor amportant. Costa Règola d'Arzervatëssa e j'assion ëd translatewiki.net, a rapresento në sfòrs e n'ampegn a goerné la sigurëssa dj'anformassion limità dl'utent ch'a son cujìe e mantnùe sij nòst servent. An tùit ij cas, translatewiki.net a peul pa garantì che j'anformassion dj'utent a restran privà. I arconossoma che, bele ch'i së sforsoma e ampegnoma a protege j'anformassion privà dj'utent, dle përson-e a podrìo anco' dësvlupé dij métod d'estrassion ëd dàit e d'àutri për dëscoaté cole anformassion e spatareje. Për costa rason, translatewiki.net a peul dé gnun-e garansìe contra l'acess pa autorisà a j'anformassion dàite durant la partecipassion ai proget translatewiki.net o a le comunità colegà.

In cases of conflicting information between a translated version of this page and the original version in the English language, the English version will take precedence over the translated version.