Translating:Lib.reviews/Terms of use/ia

Benvenite! Iste conditiones de uso es deliberatemente scripte in linguage human, amical e non legalistic. Per favor, lege los attentemente! Illos es create pro facer tu experientia melior e pro adjutar te a comprender nostre philosophia e valores. Si tu crede que illos pote esser meliorate, non hesita a suggerer un alteration. Tu pote submitter un problema sur GitHub, o suggerer le alteration sur translatewiki.net, ubi iste pagina es mantenite e traducite.

Confidentialitate

Nos conserva registros de visitatores pro usque a 90 dies. Iste registros generalmente contine un linea pro cata requesta (de un pagina, imagine, API, etc.). Cata linea contine information como le adresse IP, URL, datos user-agent (tu navigator e numero de version), information de referente, e altere datos standard que tu navigator invia quando tu visita un sito web.

Nos pote colliger registros anonymisate additional de actiones de usatores (per exemplo, quante personas ha cliccate sur un certe button), pro meliorar le sito. Si nos face isto, nos laborara pro render iste datos public de sorta que nos non es le unic personas qui pote apprender de illos.

Nos usa methodos standard (cookies, immagazinage web) pro immagazinar information in tu navigator, tales como tu clave de session de usator, tu lingua de interfacie de usator preferite, o schizzos de information que tu non ha ancora publicate.

Nos pote esser obligate a responder a demandas legal de information concernente usatores (per exemplo, a causa de un injunction judiciari). In ille casos, nos te notificara si es rationabile facer lo, e nos resistera al demandas que nos considera como non valide.

Nos non monetisa nostre usatores. Nos non te monstra publicitate, ni vende o divulga vostre datos private a alcuno (excepte quando legalmente obligate a facer lo, como notate supra), e nos non usa alcun servicio de sequimento o analytica operate per tertie partes.

Politica de conducta e contento

Nos crede que pro esser accolligente e aperte, e pro realisar bon labor, nostre communitate debe esser san e committite a un serie de principios commun de base, alcunes del quales es articulate in iste documento como politicas. Altere sitos occasionalmente executa politicas solmente quando usatores se plange satis forte, e illes lassa al usatores crear lor proprie "bullas de filtrage", interagente solmente con altere usatores con qui illes pote haber un bon relation. Nos non crede que isto conduce a communitates san, e nos laborara pro esser consequente in nostre application de iste politicas.

Nostre regulas essential de comportamento es le sequentes:

Molestia: Nos prende molestia seriosemente. Isto significa nulle attaccos personal a alteres, nulle aggression o menacia, nulle avantias sexual indesirate, e nulle revelation de information personal o de vita private de alteres.

Odio: Si tu odia personas de pelle nigre, blanc, asiatic, personas corpulente, magre, feminas, homines, homosexuales, heterosexuales, personas transgenere o non transgenere, judeos, musulmanes, christianos, atheos, o alcun gruppo de entitates sentiente, tu debera lassar isto al porta o nos non pote acceptar te hic. Es acceptabile criticar ideas, e in veritate nos supporta le formation de gruppos sur themas como “contra le potentia nuclear” o “pro le potentia nuclear”. Ma nos nunquam tolerara le uso de iste platteforma pro diffunder odio.

Calumnia: Como nos permitte recensiones de absolutemente toto, il habera situationes ubi individuos pote esser motivate a publicar information false pro discreditar un persona o un cosa. E inversemente, il habera situationes ubi personas essera motivate a asserer que information accurate es calumniose. Isto es un terreno difficile, e generalmente nos essayara resolver iste cosas per sustener dialogo e crear varie functionalitates de fide/reputation in le sito. Nonobstante, post examinar un caso specific, le moderator pote remover un recension si es determinate que illo es probabilemente false e diffamatori.

Auto-promotion e spam: Isto non es un loco pro promover qualcosa que tu ha create tu mesme o con le qual tu ha un relation intime. Nonobstante, nos te incoragia a adder metadatos sur tu producto/negotio/sito web/etc. a mesura que nos adde supporto pro illo in le sito. Il es etiam acceptabile recenser productos e servicios de concurrentes, a condition que tu divulga omne conflicto de interesse clarmente in tu recension. E nos te pete a responder a recensiones que tu crede esser inaccurate. Spam es abuso (vide infra) e essera tractate como tal.

Abuso: lib.reviews ha un scopo de sito multo clar e evidente, e si usatores systematicamente lo usa pro un altere scopo o deliberate lo perturba, isto es ration pro un banno e potentialmente un escalation a autoritates judiciari in casos sever.

Contento e comportamento illegal: Tu non pote publicar alcun contento que esserea illegal de distribuer secundo le lege statounitese, e nos pote esser legal- e moralmente obligate a reportar tal usos al autoritates in certe casos. In le caso de contento sexualmente explicite, nos seque un linea plus stricte que le lege: omne contento sexualmente explicite que involve minores de etate es prohibite. Similarmente, tu non ha permission de realisar actiones in le sito que es illegal secundo le lege statounitese.

Recensiones de contento, productos o servicios illegal: Recenser productos o servicios que clarmente visa a un jurisdiction specific ubi illos es legal (per exemplo, un dispensario de marijuana in un loco que permitte tal venditas) es completemente acceptabile. Pro contento in linea que es illegal in le Statos Unite (per exemplo, un sito de warez) o servicios que es illegal ubi illos es annunciate (per exemplo, servicios de “escort” in le major parte del Statos Unite), tu non es autorisate a publicar recensiones perque illos poterea esser interpretate como guidas o consilios pro violar le lege. Simultaneemente, in casos legalmente ambigue (per exemplo, un sito controverse como Wikileaks), nos intende inclinar verso le latere del libertate de expression.

Contento sexualmente explicite, contento choccante: Nos labora pro servir personas de tote etates, lo que significa que nos desira identificar clarmente contento dirigite a adultos como tal. Ergo, si tu crede que contento sexualmente explicite non alteremente prohibite in iste documento es appropriate in un certe contexto, nos te pete de marcar lo como tal (o le moderatores pote facer lo pro te). Nos pote tamben marcar le contento que es explicite/choccante de altere manieras.

Humanos non es productos: Nos non permitte recensiones de personas individual (recenser entitates commercial operate per solmente un persona es acceptabile). Ergo, tu non pote scriber un recension de tu vicino, o tu professor, o tu chef. Isto perque nos crede que es multo difficile proteger le dignitate e reputation de personas post transversar ille linea.

Perturbationes: Nos non tolera usatores que gaude de render alteres infelice, de dissipar le tempore de altere personas, o de causar perturbationes pro satisfaction proprie. Tal usatores pote tentar sequer le littera del politicas supra annunciate, ma violar lor spirito. Iste paragrapho existe pro dicer clarmente que in tal casos, le moderatores ha le discretion de bannir usatores.

Si tu viola nostre regulas, le moderatores del sito (probabilemente voluntarios como tu) pote bannir te temporari- o permanentemente, o pote suspender privilegios specific temporarimente. Nos essayara esser consequente e juste, ma nos etiam da al moderatores un grado de discretion in le application de iste regulas. Con le tempore, nos pote referer a decisiones precedente si es appropriate (isto pote esser considerate como un approche ‘derecto commun anglosaxone’ concernente le politicas).

Multe sitos include conditiones sur le discargamento de datos e le extraction de datos tamben, limitante le discargamento, grattage, e altere re-uso de datos. In contrasto, le information publicate sur lib.reviews es destinate a esser re-usate! Tanto que tu seque le licentia (vide infra), non usa datos pro propositos alteremente prohibite in iste documento, e non face uso excessive de nostre ressources de systema, tu es sur le bon cammino. :-)

Licentia

Le nomine “lib.reviews” refere al distinction inter gratuite e libere. Le labor que nos face hic es destinate a esser condividite e disveloppate, e a esser rendite disponibile al mundo indefinitemente. Como un consequentia, sia explicitemente declarate in cata contexto o non, publicante information per medio de iste sito tu accepta de liberar lo sub licentias libere appropriate. Nos ha adoptate le sequente licentias:

• Le texto de recensiones e messages (commentos, articulos de blog, etc.) publicate per medio de iste platteforma es rendite disponibile sub le licentia Creative Commons Attribution/CompartiSimile, le licentia usate per Wikipedia. Isto significa que, si tu vole re-usar iste contento, tu debe attribuer le autores per lor nomine de usator al latere de lor contributiones specific. Nos recommenda ligar le nomine a lor profilo sur iste sito, de maniera que le attribution sia precise etiam in casos de pseudonymos o nomines commun. (Ultra isto, tu non es obligate a mentionar lib.reviews mesme, benque es amabile si tu lo face!) Si tu modifica le contento, tu modificationes/additiones debe equalmente esser rendite disponibile sub iste licentia, un principio cognoscite como ‘copyleft’.
• A mesura que nos adde metadatos al cosas recensite (per exemplo, le horas de apertura de un negotio), iste datos es disponibile principalmente sub le licentia CC-0 (le licentia usate per Wikidata; equivalente al dominio public — “face lo que tu vole con iste datos”). Le exception es datos importate ex fontes externe sub altere licentias libere que pote requirer attribution e/o copyleft. In iste casos, le requisitos specific de licentia essera notate tanto in un forma legibile per humanos como in un forma legibile per machinas.
• Le software (incluse le paginas de texto static como iste, le quales face parte del software) equalmente es sub le licentia CC-0, salvo le bibliothecas externe de codice-fonte libere que pote esser sub altere licentias, le quales essera clarmente indicate in le repositorio del codice fonte.

Usatores pote includer imagines e altere contento multimedial in lor recensiones e contributiones, e iste imagines pote non sempre esser lor proprie obra. Considerante le natura non commercial de iste sito, nos tracta multe usos typic de tal contento web externe como uso juste (‘fair use’), ma generalmente nos removera contento si un detentor de copyright face un allegation plausibile. Si tu intende facer uso commercial de contento in iste sito, tu poterea haber besonio de applicar scrutinio additional pro assecurar que le uso juste ancora se applica.

Historia de versiones

• 1 de augusto 2016: Prime version publicate
• 4 de augusto 2017: Minor correctiones, importation sur TranslateWiki