Project:A proposito

This page is a translated version of a page Project:About and the translation is 100% complete.

---

Translatewiki.net es un platteforma de localisation pro communitates de traduction, communitates de linguas e projectos libere e open source. Illo comenciava con le localisation de MediaWiki. Postea esseva addite le supporto de extensiones a MediaWiki, de FreeCol e de altere projectos libere e open source. Vide le lista complete del projectos supportate.

Translatewiki.net non face parte del projectos del Fundation Wikimedia, ni de qualcunque altere fundation o projecto. Illo es executate per Nike e Siebrand, ambes programmatores con experientia considerabile in internationalisation e localisation, e per altere membros del personal. Le functionalitate de traduction es fornite per le extension Translate de MediaWiki. Iste wiki contine sempre codice experimental, e pote manifestar defectos de tempore in tempore. Per favor sia patiente; in general, le problemas es resolvite rapidemente. On pote reportar problemas in le pagina de assistentia.

Derecto de autor e denegationes

TRANSLATEWIKI.NET OFFERE NULLE GARANTIA DE VALIDITATE

Usa le traductiones in translatewiki.net a tu proprie risco. Illos es destinate a esser utile ma translatewiki.net non pote garantir le validitate del contento trovate hic.

Translatewiki.net e su redactores non provide alcun garantia super le contento de qualcunque maniera, sia explicite, implicite o statutari, includente, ma non limitate a, omne garantia de commercialisabilitate o adequation a un particular fin o omne garantia que le contento essera libere de errores.

Le traductiones facite per traductores es licentiate sub CC-BY 3.0, e le obras derivate pote equalmente esser licentiate sub le licentias del respective projectos libere e open source al quales le traductiones ha essite o essera addite. Le contento del paginas de usator es considerate como "tote derectos reservate" per le autor. Omne altere contento es licentiate sub CC-BY 3.0 a minus que un altere licentia o derecto de autor es indicate explicitemente.

Historia

Translatewiki.net comenciava durante 2006 como un wiki de test, programmate per Nike, in collaboration con Gangleri, qua instrumento de internationalisation pro le localisation del software MediaWiki. Illo comenciava sub le nomine Betawiki, e esseva renominate translatewiki.net in le initio de 2009, post que le sito acquireva un servitor virtual con proprie nomine de dominio le 9 de novembre 2007. In octobre 2007 translatewiki.net contribueva al localisation in circa 70 linguas, attingente 329 linguas in junio 2010. Le crescimento del numero de linguas es visibile in le tabella de objectivos de traduction attingite per MediaWiki. In januario 2010 un augmento del capacitate del servitor esseva necessari pro manear le augmento del activitate. Netcup generosemente alberga translatewiki.net depost novembre 2007.

Altere projectos libere e open source ha essite gradualmente addite a translatewiki.net, comenciante per FreeCol in augusto 2007. In junio 2010 le numero de projectos supportate ha crescite a 16.

Le contributores a translatewiki.net es totes voluntarios, con le exception de un sol membro del personal qui recipe fundos pro un parte de su tempore (vide financiamento hic infra). Programmatores, administratores e traductores esseva recrutate initialmente ab projectos de MediaWiki, principalmente Wikimedia. Le major parte de nostre contributores arriva ancora hic via MediaWiki, ma con plus projectos arrivante continuemente, MediaWiki non es plus le sol fonte de contributores. In junio 2010, le numero de traductores registrate es 1860.

In collaboration con Stichting Open Progress e FUDforum, translatewiki.net ha arrangiate plure sessiones de traduction con premios disponibile pro traductores, pro meliorar le localisation de MediaWiki e FUDforum.

• In 2008 le ONG nederlandese Hivos forniva fundos via Stichting Open Progress pro offerer premios pro traductiones in un lista de 70 a 80 linguas parlate in Africa, Asia e Latinoamerica que habeva un considerabile numero de parlantes, ma insufficiente supporto in MediaWiki.
• Al fin de 2008 esseva tenite un session de traduction del fin de anno aperte a tote le traductores.
• Durante augusto 2009 un altere session de traduction esseva organisate, financiate per Wikimedia Nederland, le capitulo nederlandese de Wikimedia.
• Wikimedia Nederland anque financiava le session del fin de anno de 2009.

Le objectivos de translatewiki.net es describite in le Introduction. Auxilios technologic pro traductores es describite in le pagina Technologia. Iste auxilios es expandite continuemente e meliorate pro facer le traduction functionar si efficacemente como possibile. Le actual necessitates e disveloppamento del sito es describite in Todo e Issues and features.

Financiamento

• Translatewiki.net es gentilmente albergate per Netcup – webspace and vServer, a expensas proprie desde novembre 2007, con augmentos del capacitate in februario 2008 e januario 2010.
• GoogleAds esseva introducite in augusto 2008, ma usque a ora isto ha generate multo pauc receptas: minus de EUR 150,00.
• Stichting Open Progress ha organisate financiamento de tempore in tempore pro sessiones de traduction pro meliorar le localisation de MediaWiki, como explicate hic supra.
• In octobre 2009 le Fundation Wikimedia ha contractate Siebrand pro laborar a translatewiki.net un die per septimana durante un anno.

Le personas detra translatewiki.net

Equipa principal

Le membros del equipa principal se occupa quasi tote le dies del execution de translatewiki.net. Illes ha anque accesso al servitores e es responsabile pro facer le cosas functionar con le minus de problemas possibile. Pro plus informationes per favor consulta lor individual paginas de usator.

Nike

Fundator, principalmente labor de programmation

Siebrand

Administrator del communitate, coordinator del projecto, programmator

Raymond

Commissor de traductiones pro MediaWiki, programmator

Nos depende etiam del labor facite per altere membros de nostre communitate:

• Gangleri – visionario precursor, non plus active
• GerardM – Ambassador, publicitate per contacto directe, blogs, StatusNet, Twitter
• Tote le contactos in projectos individual
• Tote le traductores e altere membros de iste projecto

Gruppos wiki

Como in tote le wikis, le contributores es organisate in varie gruppos, cata gruppo habente su proprie privilegios. In commun con altere wikis, personas qui se registra in le wiki es appellate usatores. Usatores es automaticamente confirmate 4 dies post registration, permittente les a inviar e-mails a altere usatores. Administratores ha plus privilegios, principalmente concernente le protection del sito contra vandalismo. Bureaucrates ha alcun privilegios ulterior, includente le concession e remotion del derectos de usatores normal, ma le stato de bureaucrate les es concedite per membros del gruppo Staff. Bots es contos de usator que pote exequer cargas automaticamente. Le derecto de importation, permittente un usator a importar paginas ex altere wikis, es rarmente usate hic.

In addition a iste gruppos wiki usual, translatewiki.net ha altere gruppos de usatores special a su objectivo. Le traductores pote modificar in spatios de nomines protegite, usante le interfacie de traduction. Alcun traductores pote laborar foras de linea a lor traductiones. Le gruppo Staff es le gerentes general de iste sito. Illes importa le messages a traducer e transfere le traductiones complete al projectos que usa translatewiki.net. Illes pote emendar le messages original in anglese directemente in alcun projectos, includente MediaWiki. Illes gere tote le aspectos del software usate hic.

Le derectos associate a cata gruppo de usatores es listate in le pagina Derectos del gruppos de usatores. Listas del membros de cata gruppo pote esser vidite in le pagina Lista de usatores.

Exploration

• Le major parte del contributores es ja familiar con le uso de software wiki. Si tu es nove al sotware wiki, tu pote apprender le rudimentos e trovar le adjuta super como modificar a MediaWiki.org.
• Discoperi como le traductores labora a iste introduction al traduction.
• Informationes technic super le software actualmente usate per translatewiki.net.
• Translatewiki.net produce statisticas pro traciar progresso in le traduction, per lingua e per projecto. Explora le statisticas e altere informationes in le pagina general de statisticas.

Description general del methodo de translatewiki.net

• In translatewiki.net le traductores traduce le interfacie de software pro productos in que le textos in anglese ha essite isolate del codice e ha essite organisate in "messages" individual.
• Quando un nove projecto se junge, le messages original in anglese es importate. Nove messages ulterior in anglese es importate de tempore a tempore.
• Le traductiones pote esser facite pro cata message in un subpagina separate del original in anglese pro cata lingua, /xxx pro le codice de lingua xxx.
• Le subpaginas nominate /qqq es usate pro le documentation de messages. Le documentation es scribite manualmente e es generalmente de melior qualitate si existe bon communication con le equipa de programmatores del software original. Si le commentos del codice-fonte face parte de un projecto de software, istes es etiam monstrate in le interfacie de traduction.
• Le traductores face suggestiones pro meliorar o corriger un message original in anglese, o pro adaptar lo pro supportar le localisation. Si acceptate, istes pote esser implementate per membros de translatewiki.net qui es etiam programmatores pro le projecto in question, o reportate al programmatores del projecto.
• Le traductiones complete pro cata lingua es "committite" al projectos per le personal de translatewiki.net, si tosto que le numero total de traductiones pro un projecto in le lingua in question ha passate le limine convenite pro iste projecto. Pro le frequentia del "commits" e le limines, vide le paginas del projectos.
• Le publication del software con le traductiones que ha essite committite a un projecto es controlate e executate per le administratores del projecto e es foras del controlo de translatewiki.net.
• Le traductores laborante a MediaWiki traduce etiam le nomines del paginas special, parolas magic e spatios de nomines, usante le pagina Traduction extendite de MediaWiki.
• Si un nove lingua es installate in translatewiki.net, le elementos localisate al initio include le scripto e su direction e un lingua de substitution; altere elementos localisate pote includer le formato del data/hora, le formato del numeros e del functiones PLURAL, GRAMMAR e GENDER. Le convergentia con le datos de localisation de CLDR es sub consideration. Al presente, le sol datos prendite directemente ex CLDR in translatewiki.net, e transferite ex iste in MediaWiki, es le nomines localisate de linguas.

Contacta nos

Tu pote lassar un message in nostre pagina de discussion principal a Support. Si tu prefere le discussion in directo, essaya nostre canal IRC #mediawiki-i18n a Freenode. Non preferite, ma si necessari pro motivos de securitate o de confidentialitate, tu pote usar e-mail como methodo de contacto a "translatewiki A xs4all PUNCTO nl" - substitue "A" per "@" e "PUNCTO" per ".", e remove tamben le spatios del adresse de e-mail.

• Tu pote discuter questiones concernente un particular lingua con su traductores in le pagina de discussion del portal del lingua.
• Tu pote discuter questiones concernente un particular projecto con su adjutatores e le representante del programmatores in le pagina de discussion del pagina de projecto.
• Tu pote discuter questiones con usatores individual in lor pagina de discussion de usator, o va e-mail (clicca super le ligamine de e-mail in le barra lateral in un pagina de usator) si illes ha optate pro permitter e-mail.