Project:Wo

This page is a translated version of a page Project:About and the translation is 100% complete.

---

Translatewiki.net je lokalizaciska platforma za přełožowanske zhromadźenstwa, rěčne zhromadźenstwa a swobodne projekty zjawneho žórła. Je so z lokalizaciju za MediaWiki započało. Pozdźišo su so rozšěrjenja MediaWiki, FreeCol a druhe swobodne projekty zjawneho žórła přidali. Hlej dospołnu lisćinu podpěrowanych projektow.

Translatewiki.net njeje ani dźěl projektow załožby Wikimedia Foundation ani někajkeje druheje załožby abo projekta wotewrjeneho žórła. Wudźeržuje so wot Nike a Siebrand, kotrejž staj wuwiwarjej a mataj kedźbyhódne nazhonjenje w i18n a l10n, kaž tež wot druhich sobudźěłaćerjow. Přełožowanska funkcionalnosć so přez rozšěrjenje MediaWiki Translate dodawa. Tutón wiki přeco eksperimentalny kod wobsahuje a wupadnuje hdys a hdys. Prošu sćerpń so, problemy budu so skoku wotstronjeja. Problemy móžeš na stronje Podpěra zdźělić.

Awtorske prawo a rukowanske wuzamknjenje

TRANSLATEWIKI.NET GARANTIJU NA PRAWOSĆ NJEDAWA

Wužiwanje přełožkow w translatewiki.net je na swójske riziko. Maja wužitne być, ale translatewiki.net njemóže płaćiwosć tu k dispoziciji stejaceho wobsaha garantować.

Translatewiki.net a jeho wobdźěłarjo njedawaja žane zaručenje na někajkižkuli wobsah, hač eksplicitnje abo implicitnje zwurzanjene abo zakonske, inkluziwnje, ale nic na to wobmjezowane, zaručenje na předawajomnosć abo přihódnosć za wěsty zaměr abo zaručenje na bjezzmylkowosć wobsaha.

Přełožki wot přełožowarjow so z CC-BY 3.0 licencuja a wotwodźene dźěła dadźa so pod licencami wotpowědnych swobodnych a wotewrjenych projektow licencować, kotrymž přełožki su so přidali abo budu so přidawać. Wobsah wužiwarskich stronow maja za awtora za "Wšě prawa wuměnjene". Druhi wobsah je pod CC-BY 3.0 licencowany, chibazo druha licenca abo awtorske prawo so eksplicitnje podawa.

Stawizny

Translatewiki.net startowaše w lěće 2006 jako testowy wiki, wuwity wot Nike, w zhromadnym dźěle z Gangleri, jako internacionalizaciski nastroj za lokalizaciju softwary MediaWiki. Startowaše so pod mjenom Betawiki, kotrež so spočatk 2009 do translatewiki.net změni, po tym zo sydło bu 9. nowembra 2007 do wirtuelneho serwera pod swojim domenowym mjenom přepołožene. Hač do oktobra 2007 bu na translatewiki.net w někak 70 rěčach lokalizowane, kotrychž ličba so hač do junija 2010 na 329 narosće. Kak ličba rěčow je narostła, je w tabeli přełožowanskich milnikow widźeć, kotraž bu za MediaWiki załožena. W januarje 2010 bu wutwar za powyšenje serweroweje kapacity trjeba, zo by ze stajnje rosćacej aktiwitu krok dźeržało. Netcup wulkomyslnje hospoduje translatewiki.net wot nowembra 2007.

Druhe swobodne projekty zjawneho žórła buchu poněčim k translatewiki.net přidate, započinajo z FreeCol w awgusće 2007. Do junija 2010 je ličba podpěranowanych projektow na 16 narostła.

Sobuskutkowacy w translatewiki.net su wšitcy dobrowólni, wothladajo wot jednoho sobudźěłaćerja, kotryž za dźěl jeho časa zapłatk dóstawa (hlej financowanje deleka). Wuwiwarjo, administratorojo a přełožowarjo buchu na spočatku z projektow MediaWiki nawabjeni, wosebje z Wikimedije. Najwjace našich sobuskutkowacych hišće přichadźeja z MediaWiki, ale přez stajne přidawanje dalšich projektow, MediaWiki jeničke žórło sobuskutkowacych wjace njeje. Junij 2010 je ličba zregistrowanych přełožowarjow 1860 była.

W sobudźěle z Stichting Open Progress a FUDForum translatewiki.net zarjadowa wjacore přełožowanske wubědźowanja z premijemi za přełožowarjow, zo by so lokalizacija MediaWiki a FUDforum polěpšiła.

• W lěće 2008 je nižozemska njeknježerstwowa organizacija Hivos přez Stichting Open Progress pjenjezy k dispoziciji stajiła. Pjenjezy buchu wužite, zo bychu zapłatki za přełožki w lisćinje z 70 hač 80 rěčemi w Africe, Aziji a Łaćonskej Americe financowali, kotrež maja zróstnu ličbu rěčnikow, ale njedosahacu podpěru w MediaWiki.
• Kónc 2008 je so kónclětne přełožowanske wubědźowanje wotměło, přistupne wšěm přełožowarjam.
• W awgusće 2009 bu přełožowanske wubědźowanje zorganizowane, financowane wot Wikimedije Nižozemskeje, nižozemskeje wotnožki Wikimedije.
• Wikimedija Nižozemska je tež kónclětne wubědźowanje 2009 financowała.

Cile translatewiki.net wopisuja so w zawodźe. Techniske pomocki za přełožowarjow wopisuja so na stronje technologija. Tute pomocki rozšěrjeja so a polěpšeja so prawidłownje, zo bychu přełožowanske dźěło tak eficientne kaž móžno činili. Potrěbnosće a aktualne wuwiće wopisuja so na stronomaj Todo a Issues and features.

Financowanje

• Translatewiki.net so wot nowembra 2007 přećelnje wot Netcup – webspace and vServer na jich kóšty hospoduje, z aktualizacijemi we februarje 2008 a januarje 2010.
• GoogleAds bu w awgusće 2008 zawjedźeny, ale je dotal jara mało wunjesł - mjenje hač 150 EUR.
• Stichting Open Progress je hdys a hdys financowanje přełožowanskich wubědźowanjow zorganizował, zo by so lokalizacija MediWiki polěpšiła.
• W oktobrje 2008 je załožba Wikimedia Foundation ze Siebrandom zrěčenje wotzamknyła, zo by lěto dołho jedyn dźeń wob tydźeń na translatewiki.net dźěłał.

Ludźo za translatewiki.net

Hłowny team

Čłonojo hłowneho teama su nimale kóždy dźeń na translatewiki.net aktiwni. Maja tež přistup na serwery a su za to zamołwići, zo wěcy z tak mało problemami kaž móžno funguja. Za dalše informacije hlej na jich indiwiduelnych wužiwarskich stronach.

Nike

Załožer, zwjetša wuwiwanske dźěło

Siebrand

Zarjadnik zhromadźenstwa, projektowy koordinator, wuwiwar

Raymond

Přepodawar přełožkow za MediaWiki, wuwiwar

Wotwisujemy tež wot dźěła, kotrež druzy čłonojo našeho zhromadźenstwa činja:

• Gangleri – něhdy wizionar, wjace njeaktiwny
• GerardM – Reprezentant, zjawnostne dźěło přez direktny kontakt, blogi, StatusNet, Twitter
• Wšě kontakty w jednotliwych projektach
• Wšitcy přełožowarjo a druzy čłonojo tutoho projekta

Skupiny

Wšitcy sobuskutkowacy su we wšelakich skupinach zorganizowani, kóžda skupina ma swójske prawa. Kaž na druhich wikijach rěkaja zregistorwani ludźo wužiwarjo. Wužiwarjo so 4 dny po registrowanju awtomatisce wobkrućeja, štož jim dowoluje, druhim wužiwarjam e-mejle pósłać. Administratorojo maja wjace prawow, hłownje za škitanje sydła přećiwo wandalizmej. Běrokraća maja hišće wjace prawow, inkluziwnje dawanje a wotstronjenje wužiwarskich prawow, status běrokrata wšak da so wot sobudźěłaćerja. Boćiki su wužiwarske konta, kotrež móžeja wěste nadawki awtomatisce wuwjesć. Importowanske prawo , kotrež wužiwarjej dowola, strony z druhich wikijow importować, so tu zrědka wužiwa.

Přidatnje k tutym zwučenym skupinam, translatewiki.net tež ma wužiwarske skupiny za specielne zaměry. Přełožowarjo móžeja z pomocu přełožowanskim wužiwarskim powjerchom w škitanych mjenowych rumach wobdźěłać. Někotři přełožowarjo móžeja offline na swojich přełožkach dźěłać. Sobudźěłaćerjo su zarjadowarjo tutoho sydła. Woni importuja zdźělenki, kotrež maja so přełožować a přepodawaja dokónčene přełožki projektam, kotrež translatewiki.net wužiwaja. Móžeja na někotrych projektach jendźelske žórłowe zdźělenki změnić, inkluziwnje MediaWiki. Rjaduja wšě aspekty tu wužiwaneje softwary.

Prawa, kotrež buchu kóždej wužiwarskej skupinje připokazane, namakaš na stronje Prawa wužiwarskeje skupiny. Lisćiny čłonow kóždeje skupiny namakaš na stronje Lisćina wužiwarjow.

Wuslědźenje

• Najwjace sobuskutkowarjow hižo wuznawa so we wužiwanju wikisoftwary. Jeli wikisoftwara je nowa za tebje, móžeš zakładne znajomosće wo wobdźěłowanju na MediaWiki.org wuknyć.
• Přečitaj tutón nawod do přełožowanja, zo by wuslědźił, kak přełožowarjo dźěłaja.
• Techniske informacije wo softwarje, kotraž so tuchwilu na translatewiki.net wužiwa.
• Translatewiki.net wjedźe statistiki, zo by postup w přełožowanju po rěča a projekće slědował. Wuslědź statistiki a druhe informacije na powšitkownej stronje statistikow.

Přehlad wo metodźe translatewiki.net

• Na translatewiki.net přełožowarjo přełožuja powjerch softwary za produkty, hdźež jendźelske znamješkowe rjećazki su so z koda izolowali a do jednotliwych "zdźělenkow" rozdźělili.
• Hdyž so nowy projekt přidawa, budu so jendźelske žórłowe zdźělenki importować. Hdys a hdys so dalše nowe jendźelske zdźělenki importuja.
• Přełožki hodźa so w kóždej rěči za kóždu zdźělenku na wosebitej podstronje jendźelskeho originala činić, /xxx za rěčny kod xxx.
• Podstrony z mjenom /qqq so za dokumentowanje powěsće wužiwaja. Dokumentacija so manuelnje pisa a ma zwjetša tam lěpšu kwalitu, hdźež dobra komunikacija z originalnym teamom softwaroweho wuwiwanja eksistuje. Jeli komentary ze žórłoweho koda su dźěl softwaroweho projekta, tute so tež na přełožowanskim powjerchu zwobraznja.
• Přełožowarjo namjetuja originalnu zdźělenku polěpšić abo korigować abo ju přiměrić, zo by lokalizaciju podpěrała. Jeli su přezjedni, implementuja je čłonojo translatewiki.net, kotřiž su wuwiwarjo we wotpowědowacym projekće, abo zdźěleja so projektowym wuwiwarjam.
• Dokónčene přełožki za kóždu rěč "přepodawaja" so sobudźěłaćerjam translatewiki.net, tak ruče kaž cyłkowna ličba přełožkow za projekt w tej rěči je dojednanu minimalnu hódnotu překročiła. Za častosć přepodaćow a minimalne hódnoty hlej projektowe strony.
• Wozjewjenje přełožkow wotpowědneje softwary, kotrež su so projektej přepodali, kontroluje so a wuwjedźe so wot projektowych administratorow a translatewiki.net nima wliw na to.
• Přełožowarjo, kotřiž na MediaWiki dźěłaja, přełožuja tež mjena specialnych mjenow, magiske słowa a mjenowe rumy z pomocu strony Rozšěrjene přełožowanje MediaWiki.
• Hdyž so nowa rěč na translatewiki.net připrawja, zapřijimaja zapiski, kotrež so na spočatku lokalizuja, pismo a jeho směr a narunansku rěč; druhe lokalizowane zapiski móžeja datumowy a časowy format, ličbowy format a funkcije PLURAL, GRAMMAR a GENDER wobsahować. Konwergenca z lokalizaciskimi datami CLDR so runje rozwažuje. Tuchwilu přełožene rěčne mjena su jeničke daty, kotrež so direktnje z CLDR do translatewiki.net a MediaWiki přejimaja.

Kontakt

Móžeš powěsć na našej diskusijnej stronje Podpěra zawostajić. Jeli preferuješ žiwu diskusiju, da spytaj naš IRC-kanal #mediawiki-i18n na freenode. Hačrunjež to njepreferujemy, to wšak je snano dla přičinow wěstosće abo priwatnosće trěbne, móžeš e-mejl jako kontaktnu metodu přez "translatewiki AT xs4all DOT nl" wužiwać - wuměń "AT" přez "@" a "DOT" přez "." a wotstroń tež mjezery z e-mejloweje adresy.

• Móžeš problemy nastupajo wěstu rěč z jeje přełožowarjemi na diskusijnej stronje rěčneho portala diskutować.
• Móžeš problemy nastupajo na wěsty projekt z jeho sobuskutkowarjemi a wuwiwarjemi na diskusijnej stronje projektoweje strony diskutować.
• Móžeš problemy z jednotliwymi wužiwarjemi na jich diskusijnych stronach abo přez e-mejl (klikń na e-mejlowy wotkaz w bóčnicy wužiwarskeje strony) diskutować, jeli woni su e-mejl dowolili.